शंभर रुपयांसाठी कुऱ्हाडीने तोडला हात

 

दारूच्या नशेत वाहनचालकांना 'हॅपी न्यू इयर' म्हणण्यावरून तसेच शंभर रुपये न दिल्याच्या कारणावरून तरुणाच्या हातावर कुर्‍हाडीने वार करून हात मनगटापासून तोडल्याचा प्रकार नववर्षाचे स्वागत करत असताना एकच्या सुमारास घडला.

चतुःश्रृंगी पोलिस ठाण्याच्या हद्दीतील साई चौकात ही घटना घडली. पंकज तांबोळी असे गंभीर जखमी तरुणाचे नाव आहे. पंकज हा सीडॅक एसीटीएस या इन्स्टिट्यूटमध्ये डॅक कोर्स करीत आहे.

याप्रकरणी चतु:श्रृंगी पोलिसांनी गौरव गौतम मानवतकर (वय 20, रा. तोंडे चाळ, सुतारवाडी, पाषाण) याला अटक केली असून, त्याच्या तीन अल्पवयीन साथीदारांना ताब्यात घेतले आहे. याबाबत आशुतोष अर्जुन माने (वय 24, रा. दुर्वांकूर, पंचवटी, पाषाण) यांनी फिर्याद दिली आहे. फिर्यादी आशुतोष माने व त्याचे मित्र पंकज तांबोळी, साजीद शेख हे खानावळ बंद असल्याने साई चौकातील ईर्षाद हॉटेलमध्ये जेवणासाठी आले होते.

रात्री नववर्षाचे स्वागत करून जेवण झाल्यावर रात्री एकच्या सुमारास ते हॉटेलबाहेर उभे असताना मोटारसायकलवरून दोघे जण आले. ते दारूच्या नशेत जबरदस्तीने 'हॅपी न्यू इयर' म्हणत होते तसेच त्यांनी पंकजकडे जबरदस्तीने शंभर रुपयांची मागणी केली. पंकजने पैसे देण्यास नकार दिला. यावेळी पंकजच्या खिशातून जबरदस्तीने पैसे काढत असताना त्याने विरोध केला. आरोपींनी शिवीगाळ करण्यास सुरुवात केली. त्यामध्ये एका आरोपीने फोन लावून त्याच्या आणखी साथीदारांना बोलवून घेतले. त्याचे साथीदार आल्यावर पुन्हा वाद झाला.

यावेळी पंकजचे मित्र साजिद आणि आशुतोष थोडे पुढे आले. तेव्हा त्यांना मागे पंकजच्या ओरडण्याचा आवाज आला. त्यातील एका आरोपीने त्याच्या हातातील कुर्‍हाडीने पंकजचा हात मनगटापासून तोडल्याचे निदर्शनास आले. पंकजचा तुटलेला हात आणि रक्त पाहून ही मुले घाबरून पळून गेली. त्याच्या हातातून रक्तप्रवाह मोठ्या प्रमाणात होत असल्याचे निदर्शनास आले. पोलिसही लगेच घटनास्थळी पोहोचले. त्यांनी हाताचा पंजा एका प्लॅस्टिकच्या पिशवीत भरला त्याला लगेच जवळच असलेल्या रुग्णालयात नेले.