भावासोबत झालेल्या भांडणाचा राग चिमुकल्यावर काढला

 

नाशिकच्या त्र्यंबकेश्वर तालुक्यातील आधार तीर्थ आश्रमात एका चार वर्षीय बालकाची हत्या करण्यात आल्याची धक्कादायक घटना 23 नोव्हेंबरला समोर आली होती.

आत्महत्याग्रस्त शेतकऱ्यांची मुलं या आश्रम शाळेत राहतात, त्यामुळे या घटनेमुळे एकच खळबळ उडाली. यानंतर या घटनेसंदर्भात एक महत्त्वाची अपडेट समोर आली आहे. या घटनेचा तपास त्र्यंबकेश्वर पोलिसांकडून सुरू आहे. या आधार आश्रमातील हत्येप्रकरणी अल्पवयीन संशयिताला अटक करण्यात आली आहे.

नाशिकच्या त्र्यंबकेश्वर आधार आश्रमात एका चार वर्षीय बालकाची गळा आवळून हत्या करण्यात आली. मोठ्या भावासोबत झालेल्या भांडणाचा राग काढण्यासाठी चार वर्षाच्या चिमुकल्याची हत्या केल्याची कबुली आरोपी अल्पवयीन मुलाने दिली आहे. नाशिकच्या त्र्यंबकेश्वर पोलिसांनी 16 वर्षीय अल्पवयीन संशयिताला याप्रकरणी अटक कली आहे. पोलिसांनी दिलेल्या माहितीनुसार, आलोक विशाल शिंगारे असं या चार वर्षाच्या बालकाचे नाव आहे.

आत्महत्याग्रस्त शेतकऱ्यांचे मुले तसेच गरीब कुटुंबातील मुलांसाठी असलेल्या नाशिकच्या त्र्यंबकेश्वर येथील आधार तीर्थ आश्रमात सोमवारी चार वर्षाच्या बालकाचा गळा आवळून खून करण्यात आला असल्याचा धक्कादायक प्रकार समोर आला. सुरुवातीला ही हत्या आहे की आत्महत्या आहे अशी चर्चा सुरू असताना ही हत्या असल्याचं समोर आल्यानंतर त्र्यंबकेश्वर पोलीस ठाण्यात या प्रकरणी खुनाचा गुन्हा दाखल करण्यात आला.